لطميات و قصائد مكتوبه

السلام عليكم ورحمة الله وبركاته
احضرت لكم لطميات اخرى تفضلوا:
******************************************
.. شيعتي يا كرام ..



شيعتي يا كرام - يا عظامَ المقام
فإندبوا يا حسين- بفؤادٍ حزين

شيعتي إني غريبٌ بين أقوامٍ بغاتِ
و أنا الضامي و أُسقى من كؤوسِ النائباتِ
قطعوا رأسي ظُلماً بسيوفٍ مرهفاتِ
رفعوه بعد قتلي فوق أطراف القناتِ
ذاك رأسي مُشال - في رماحٍ طوال
و قطيعُ الوتين - بفؤادٍ حزين

شيعتي إن غاب عنكم في سماءِ الموتِ فرقد
فإذكروا الأكبر لما غاله السيف المجرد
و قتيلاً فوقه الأرماحُ و الأسيافُ سُجّد
و به قد صرعوا فوق الثرى جسمَ محمد
و شبيهُ الرسول - وطأتهُ الخيول
و فقدتُ البنين - بفؤادٍ حزين

شيعتي ما إن سمعتم من منادي وا أخاهُ
فإذكروا العباسَ لما قُطعت منه يداهُ
جئتهُ نحو الفراتِ قاصداً كيما أراهُ
فوجدتُ الجسدَ الطاهرَ تكسوهُ دماهُ
فإهتفوا بإنكسار - أين ذاك اليسار
أين ذاك اليمين - بفوادٍ حزين

شيعتي ما إن فقدتم من غلامٍ ذي مكارم
فإندبوه بدموعٍ و إذكروا لوعة قاسم
هو كالبدرِ تجلّى و جلّى تلك الغمائم
بدل الأشمعِ قد زُف بأطراف الصوارم
غاب ذاك الهلال - في بروج القتال
غاب نور اليقين - بفؤادٍ حزين

شيعتي ما إن فقدتم من رضيعٍ و هو ضامٍ
فإذكروا طفلي لما قتلوه بإهتضامِ
بدل الماءِ سقوه من أنابيب الحِمامِ
بأبي من ذاق طعم الموت من قبل الفُطامِ
ذاك نحر الرضيع - فاض منه النجيع
و دفنت الجنين - بفؤادٍ حزين

شيعتي ما إن شربتم عذبَ ماءٍ فاذكروني
أو سمعتم بقتيل أو شهيدٍ فإندبوني
فأنا السبط الذي من غير حرمٍ قتلوني
و بجرد الخيل بعد القتلِ عمداً سحقوني
ليتكم حاظرون - للنداء تسمعون
هاتفاً بأنين - بفؤادٍ حزين
*******************************************
.. بنت البتول ..


بنت البتول الشافعة - لإبن الوديعة تودعه
بين الخيم - صرخة ألم
ضلع أمك اليوم إنهشم

بدرين واحد بالأرض والثاني بأعنان السمة
بدر الأرض شايل علم وبدر السمه دموعه دمه
رغم الضوى ورغم الشعاع إلي يشع هالدنيا أمست مظلمة
بليل وسكون ووحشة يرسمها الدمع إنجمعن ودايع فاطمة
بلهفة وداع وجمرة دموع وظمة وبين ايد أخوها تماثلت أم الخدر وتكلمه وشتكلمه
لا هو صبر لا هو بچي ولا هيه سكتة ولا حچي تحچي ويا خوها بالإشارة والومة
وتگله روحي على الغصص متعلمة
بين ايدك أشعر گلبي يا حسين إرتمى
چن أسمع الناعي نعى - لوح نذير الفاجعة
بوجهي إنشهر - سيف القهر
وسلمت روحي للعدم

وداعك جمر لا بل أحر من الجمر
يبن أمي بس هالليلة ما ظلت سواها بالعمر
ومن يجزي هذا الليل والأبيض يطر
نفتح باب جروحك وتتغلگ أبواب الصبر
وأصرخ إذا جسمك إلبيض توذره وراسك على روس السمر
أصرخ صريخ الثچلة إلما تدري تمشي ليا كتر
اليوم فگدت جدي النبي اليوم إنطبر فارس بدر
واليوم بالباب إنهشم ضلع أمك الزهرة الطهر
والليل آه الليل وهمومه شكثر
من يجزي هذا الليل والأبيض يطر
أنظر جثث متبضعة - بالمشرفية موزعة
والدم يصب - فوگ الترب
بمصرع عواميد الشيم

ويلاه يا ليل الكدر ويلاه يا ضيم الدهر يا گلبي شكثر تحمل قهر
يا إبن أمي لو شفتك ذبيح وعالغبرة جسمك من يطيح ولو عاينت دمك يسيح وينزف مصبه من النحر
عالتل أجيك أصرخ وأصيح إنهض يا بن هيبة مضر
إدرك خواتك خويه داهمها الخطر
هجمت خيول بلا عدل والجمر بخيمنه إستعر
وكل حافر إليسحگ طفل يذكرني بضلع أمي الوديعة إلي إنكسر
بين الحريم اللايعة - وبين اليتامة الفازعة
أبدي الورع - وبلا جزع
أتوزع بجمع الحرم

يا بن أمي بعيونك شفت كل حرف من وصيته
عن رگبتك باجر يا خويه بالدمع أغسل نزف دم رگبتك
عن جثتك گلبي أحفره وبالگلب أدفن يا خويه جثتك
عن عيلتك لو حرگوا عليها الخيم دلالي خيمة لعيلتك
باجچر لون شفتك تريب وفوگ الترب جسمك سليب ما أگطع عليك النحيب بكل دمعي أبچي لفرگتك
آنه الغريبة يا الغريب حرگتني جمرة لوعتك
باچر خواتك هارعة - بهاي الصحاري الشاسعة
ومن يشهر - سيف الغدر
وتتگطع جسود الهمم

********************************************
.. يا دنيه ..


مسلم شمال القلب من دنياي مسلم
أظل طيب أظل والدين مسلم
يصب دمعي لمصاب أطفال مسلم
يريت إلصار بيهم صار بيه


يا دنيه ما ظل والي - يا دنيه حتى أطفالي
يا دنيه راحوا تالي - يا دنيه هضموا حالي

بالكوفة مسلم وحده - ما بيها ناصر عنده
عدوانه خانوا عهده - وبصبره باذل جهده
بالغربة حفروا لحده - ما تطفى جمرة فقده
وأطفاله تاهوا بعده - راووها نفس الشدة
أولادي وآنه أمهم - أولادي سفكوا دمهم
أولادي محد يمهم - أولادي شغلوا بالي

ما ننسى حال العترة - شفناها فوق الغبرة
سيدها قطعوا نحره - خياله داسوا صدره
وعياله جذبت حسرة - عالوالي تجري العبرة
وأطفاله هالمنذعرة - مرعوبة صوب القفرة
طفليني هم وياهم - طفليني ما أنساهم
طفليني وين ألقاهم - طفليني تتراوى لي

بدموعي عنهم أسأل - يا ديرة محد يندل
دلالي ظل يتأمل - عالفرقة ما أتحمل
لن ناعي صاح ورتل - طفلينج بلا معقل
ذبحوها يم الجدول - والثاني يم الأول
ما أنسى وشلون أقدر - ما أنسى دوم أتذكر
ما أنسى هذا المنظر - ما أنسى فقد الغالي

أطفالي راحو مني - وبقلبي جمرة وني
مهمومة وخايب ظني - وهمومي ما رحمني
محتارة بالطف لني - ولا والي ينشد عني
مخلوقة للهم جني - والونة صارت فني
أتمنى يقرب أمري - أتمنى يخلص عمري
أتمنى مسلم يدري - أتمنى يتعنى لي
***************************************
.. يبن الكرار ..



هذا إنت يبن الكرار أول بنيني
وحدة من الإثنين إختار مهجتي وعيني
وإقبل هديتي يبني

يا أول شبل من الأربعة الأشبال - وأبوك السد لو زنجر يصب زلزال
ورثت منه الشهامة وغيرة الأبطال - ومثله لمن تزنجر تهز جبال
شتطلب يا عباس أنطيك هاي آنه أمك
بحسين أخوك ارد أوصيك ضحي له دمك
وإحفظ وصيتي يبني

يا لهفة صدر ما بطلت ونته - وصية وياك يا من للعهد صنته
أخوك حسين قلبي والضلع إنت - بيك حسين أحفظه وبيك أمنته
يا وليدي سجل بدماك عهد الوصية
ومن توفي يصبح فرقاك هين عليه
هون رزيتي يبني

نم تمشي الضعينة وإنت تحديها - تكفل بالعقيلة وصير واليها
جفن للعين إنت وبيك أغطيها - وصبي عيني زينب وإنت تحميها
إنت الجفن هيه العين إحرس نظرها
بالمنحر وبالجفين أحفظ خدرها
وإحرس ثنيتي يبني

إذا شفت العطش جمراته تتلفع - أريدك إنت تروي العيلة والرضع
إخذ جود السقاية وللنهر إطلع - وإذا ما تجيب ماي وياك لا ترجع
ما غيرك إليطفي النار نار الرزية
طبع الوفى بروحك صار أوضح سجية
تعرف سجيتي يبني

إحفظ هالوصاية بينك وبيني - يا عباس بحياة حسين تحيني
إذا عينك عزيزي هاك إهذ عيني - وإذا جفين رايد إخذ جفيني
كل شي الذي تريده يهون بس توفي وعدك
عمري ويا عمرك مرهون هاي آنه بعدك
أنطر منيتي يبني
****************************************
.. بعد ما أشوفك ..



أخاف من أعوفك - بعد ما أشوفك
إذا ماتجيني اقدر ظروفك
طويلة رحلتي - واخاف برجعتي
بعد ما أشوفك

يعباس إختك آنه ولا تبارحني - جنت إنت إلتمسيني وتصبحني
بفرقتك ذلتي وشوفك يفرحني - وكلام الشامت بفرقاك يجرحني
يريت الموت أخد روحي ويريحني - وإذا أنساك الله لا يسامحني
أخاف أشتكيلك - وأعذب دليلك
وأريد بدموعي أبرد غليلك
تودعك دمعتي - واخاف برجعتي
بعد ما أشوفك

أودعك يابن أبويه ولليسر اطلع - وأعوفك بدر غايب نوره بالمصرع
مثل جسمك توذر قلبه وإتقطع - وكلامي وياك صار يترجمه المدمع
إذا أرجع يخويه شراح أتوقع - إذا أرجع أشوفك بعد من أرجع
أباصر دليلي - بسفرتي ورحيلي
قلت له عجيبة أفارق كفيلي
على فقدك حسرتي - وأخاف برجعتي
بعد ما اشوفك

أصيحن وإليموت شينفعه الصايح - سكتت ودموعي جدول عالوجن سايح
غصب عني أعوفك والضغن رايح - بلا توديع أتركك عالنهر طايح
تعاتب لا تعاتب و العتب جارح - تودني و إليود من شيمته يسامح
ضعنه برواحة - يريد السماحة
تسير الضعينة بونين ونياحة
تنشدك مهجتي - وأخاف برجعتي
بعد ما اشوفك

أنشدك لو مشيت بضعني وأتيسر - تقدر تنهض تشد الضعن تقدر
اذا بسياطه خصمك يضرب الخدر - تقدر تحمي عيلة وسايرة بهالبر
اذا جتالك بمجلس شتم حيدر - تقدر تجي هناك تدافع وتحضر
اذا وقفونه بمجالس عدونه - حرم وإحنه نسمع يشتمون أبونه
شينشف عبرتي - وأخاف برجعتي
بعد ما اشوفك

إذا مسبية من يمك رحت ومشيت - وعني ما قمت يا با الفضل حاميت
اذا مجلس دخلت وحايرة ظليت - إذا حشمتك وللنخوة ما لبيت
العذر مقبول منك خوية لو ماجيت - شلون تقوم وإته بس جسد ظليت
ياجمرة حنيني - يعذرك ونيني
عسن مني قطعوا يساري ويميني
شيرجع لهفتي - وأخاف برجعتي
بعد ما أشوفك

شخلت ساحةا لطف خذت مني حيول - شحجي ويا النهر والسهم والعامود
فطر جبدي العطش من نار سهم الجود - إذا تسكن لحد أسكن يخويه لحود
للطف يبن أبويه الضعن من يعود - أخافن ما أشوفك لو رجعت ردود

يطول غيابي - وأجيك بمصابي
إذا ما لقيتك تزيد عذابي
تهيج جمرتي - وأخاف برجعتي
بعد ما أشوفك
*********************************************
انشاء الله تعجبكم اللطميات هذه
انشاء الله اجيب المزيد
وهذه اللطميات من منتديات بقية الله
وشكرا......والسلام